რატომ დაადეს ვეტო "საქართველოს ვარსკვლავის" მერვე ლაივ-კონცერტზე მაყურებლის გადაწყვეტილებას?

გუშინ, ყველაზე რეიტინგული მუსიკალური პროექტის - "საქართველოს ვარსკვლავის" მერვე ლაივ-კონცერტზე, უპრეცედენტო შემთხვევა დაფიქსირდა. აუტსაიდერების გამოცხადების შემდეგ სცენაზე მოულოდნელად ნიკა გვარამია აიჭრა და "რუსთავი 2"-ის სახელით განცხადება გააკეთა.

მაყურებლის გადაწყვეტილებას, რომლის თანახმადაც პროექტს კონკურსანტი მარიკო ლეჟავა ტოვებდა, ვეტო დაადეს.

ვინც არ იცით, გეტყვით, რომ ვეტო - ლათინური სიტყვაა და ნიშნავს - "მე ვკრძალავ". ის მიუთითებს, რომ გარკვეულ მხარეს აქვს უფლება, ერთპიროვნულად შეაჩეროს კანონმდებლობის გარკვეული სენტენცია, ნაწილი.

ამ გადაწყვეტილებას "საქართველოს ვარსკვლავის" გვერდზე ძალიან ბევრი ადამიანი გამოეხმაურა. საგრძნობლად იმატა უარყოფითმა კომენტარებმა პროექტის ორგანიზატორების მიმართ. მათი აზრით, ეს იყო უსამართლობა მაყურებლის მიმართ, რომლებმაც ზარები არ დაიშურეს იმისთვის, რომ თავიანთი ფავორიტი ოთხეულში ეხილათ და ახლა ისევ ხუთეულში უნდა იყოს და სამეულში მოხვედრის შანსი შეუმცირდათ.

ნაწილი მიიჩნევს, რომ ვეტოს უფლება ჩავარდნილი ზარების რაოდენობის გასაზრდელად და მარიკო ლეჟავას გადასარჩენად გამოიყენეს. შემდეგ ტურში მარიკო რომ დარჩეს, მათი აზრით, მაყურებლისაგან დიდი აგრესია წამოვა და სამართლიანიც იქნება.

როგორც ვიცი, ვეტოს უფლების გამოყენებას მიმართავენ რეიტინგის გამოცხადების შემდეგ, რათა გადაარჩინონ გავარდნილი კონკურსანტი. ამ შემთხვევაში კი, ვეტო დაადეს მანამდე, სანამ მაყურებელი გაიგებდა, თუ ვინ იყო გაგდების კანდიდატი. თუ გავითვალისწინებთ იმასაც, რომ წინა ლაივ-კონცერტზე რეიტინგი საერთოდ არ აჩვენეს, მაშინ მაყურებლის უნდობლობა და ეჭვი გასაკვირი არაა.

კონცერტის დასრულებისთანავე დავუკავშირდი პროექტის ერთ-ერთ წამყვანს, გიორგი ქორქიას, რომელმაც შემდეგი კომენტარი გააკეთა: "არ ვიცი, რატომ დაადეს ვეტო. მე გაფრთხილებულიც არ ვიყავი და როდესაც ნიკა გვარამია სცენაზე ამოვიდა, ცოტა დავიბენი".

ვესტუმრე ნიკა გვარამიას "ფეისბუქის" გვერდსაც, სადაც კონცერტის მსვლელობის დროს მობილური ტელეფონის საშუალებით დაწერილი კომენტარი ვნახე: - "რომელია კიდევ საქართველოში ასეთი კონცერტი? ვის გინახავთ? თან უკვე მესამეა ზედიზედ! მხოლოდ "რუსთავი 2"-ზე და მხოლოდ ჩვენი და ჩვენი საოცარი ბავშვების შემოქმედება.
მე თქვენ მიყვარხართ და მეამაყებით მარიკო ლეჟავა, ნინა სუბლატი, ნუკა გვალია, ლეო მასპი და ირაკლი ფუტკარაძე".

სტატუსის კომენტარებში ასევე გაიმართა დისკუსია, რომელსაც პროექტის პროდიუსერი - გიორგი ხაბურძანია გამოეხმაურა.

"დამიბრუნეთ ჩემი ყველა ზარი (ეს მხოლოდ დღევანდელი) ან, თუ ჩემი ფავორიტი პროექტის დატოვების კანდიდატი იქნება, გადმოიღეთ მეორე ვეტო თაროდან, იმიტომ, რომ ის უნდა იყოს ტოპ 4-ში, რადგან დღეს გავიდა ის ტოპ 4-ში.

ვეტოს უფლებაც რომ გაქვთ, ესეც მისაღებია, თქვენ ბრძანდებით პროექტის ოუნერები, გასაგებია. ოღონდ მე, როგორც გულშემატკივარი, დავზარალდი, ჩემი ეს იდეაფიქსი და ხელფასის 40% წყალში ჩამიყარეთ."

გიორგი ხაბურძანია: "ვეტო ფორმატის ნაწილია ამერიკაში. ამას "save"-ს ეძახიან და გავარდნილს გავარდნის შემდეგ აბრუნებენ. ამის გამოყენება სეზონზე მხოლოდ ერთხელ შეიძლება. ჩვენ ის შევცვალეთ მარტო, რომ იმ პატიოსანმა ხალხმა, ვინც ერთი ზარი მაინც გამოუშვა, არ დავუკარგოთ ეს ზარები და გადავიდეს შემდეგ კვირაშიც.

ვეტოს მეტს ვეღარ გამოვიყენებთ და შესაბამისად, ვისაც დაურეკავენ ყველაზე მეტს, ის გაიმარჯვებს."

ნიკა გვარამია კი მოკლე კომენტარით შემოიფარგლა: "ვფიქრობ, ძალიან მაგარი კონცერტი იყო, ყველამ ძალიან კარგად იმღერა და გადავწყვიტეთ, არავინ არ გავარდნილიყო ამჯერად".

პროექტის ტოპ-ხუთეული რომ მაგარია, ამაზე ორი აზრი არ არსებობს, მაგრამ საინტერესოა, კიდევ რამდენჯერ გამოიყენებს "რუსთავი 2" ვეტოს უფლებას?.. საინტერესოა, რა შედეგებს გამოიწვევს მათი გადაწყვეტილება და რომელი კონკურსანტი "დაზარალდება" შემდეგ ლაივ-კონცერტზე.

თუმცა, დაველოდოთ მოვლენების განვითარებას და ვნახავთ. დღეს კი "საქართველოს ვარსკვლავის" "ფეისბუქის" გვერდზე ვეტოს უფლების გამოყენების განხილვა გაიმართება.

butterfly

წყარო